قلب طفل كبير

موضوع: قلب طفل كبير الجمعة أبريل 11, 2008 1:26 pm

يمشى
خطوتين ويقف دقائق,فهو يهوى التسكع فى الشوارع, أى شىء ينسيه الحزن الشديد
الذى يملأ صدره,يتسمر كطفل صغير أمام محل لعب يفكر ألف مره أن يدخل ويشترى
لعبه أعجبته ألا انه يتذكر أنه قريبا سيتم عامه الثلاثين,يمضى فى تسكعه
ممنيا نفسه أنه سيشتريها أول الشهر..أرجله تتجه الى الأمام ورأسه مازالت
تنظر للخلف كأنها تودع لعبته الصغيره.
فجـــأه يجد يد تمتد وتحضن يده وجسم يلتصق به,ينظر بجانبه يجد فتاه تمسك
بذراعه وتنظر أليه نظره أحتار أن يفسرها بأنها أبتسامه فرحه أو أبتسامه
عبط....تمنعه الخضه أن ينطق لثوانى ثم يسألها بصوت مبحوح:
"مين حضرتك؟..فيه حاجه؟".
هى:"أيه السؤال الغريب ده؟...أنا أول مره أشوفك أساسا".
هو:"طيب حضرتك مسكه ذراعى..ممكن تسيبيه؟ انا عوزه"
هى:"حلوه كلمه حضرتك ديه...هو انا كنت شبه الأبله عندك فى المدرسه؟"
هو:"ممكن تسيبى دراعى... شكلى وحش أوى فى الشارع...أفرضى حد شفنى كده يقول أيه؟؟"
هى:"هو مين فينا ألى يخاف على منظره..روق كده وسبها لله".
هو:"سبها لله؟؟؟...هو فيه حد يعرف ربنا يمسك ذراع واحد ميعرفوش كده؟؟؟".
هى:" مين قال انى معرفكش؟؟ انا عارفه انك طيب وقلبك قلب طفل كبير هو أنت فاكر يعنى أنى همسك ذراع أى حد فى الشارع كده يعنى؟؟"
هو:"يسلام؟..وعرفتى منين بأه أنى طفل كبير؟؟ أنتى نشلتى البطاقه؟؟؟".
هى:" أنا مش حراميه أحترم نفسك...مفيش حد يقف قدام محل لعب أكثر من نصف ساعه ألا لو هو عنده قلب طفل كبير".
هو:"أنت كمان مرقبانى؟؟؟؟؟؟؟.....أنا عارف أن فيه أزمه عرسان فى البلد لكن مش للدرجه ديه...أنا أسف بس انا مرتبط (متكلمين عليا)".
هى:"هاهاهاهاهاهاه دمك خفيف أوى...مش عيب بألنا ساعه وقفين ولا عزمتنى على
حاجه ساقعه ولا حتى سندوتش...فين الرجوله؟ ماتوا الرجاله خلاص"
هو:"سندوتش أيه بس...سيبي دراعى بالذوق أحسن"
هى:"حاول تشد دراعك كده وانا أصوت وألم الناس عليك وأقول انك بتعكسنى" .
فجأه يسمع صوت فرامل سيارات..شاب كبير الحجم يعبر الشارع كالمجنون دون أن ينظر حوله.
هى:"شايف الراجل المجنون ده؟؟"
هو:"أه ماله؟؟"
هى:"ده خطيبى"
لا ينطق بكلمه ويمسك فى ذراعها بقوه.
الشاب المجنون:" مين ده يا أستاذه؟؟؟"
هى:"انت عاوز منى أيه؟؟؟ قلتلك مبحبكش..ده خطيبى الجديد".
الشاب المجنون:"سيبانى علشان البرص ده؟؟"
هى:"مسمحلكش تكلم حبيبى كده"
هو:"أه.. هى متسمحلكش تقول كده " وينظر أليها "حبيبك من امتى؟".
فجأه لا يتمالك الشاب المجنون أعصابه ويوجه أليه لكمه وشلوت ورفصه وعضه فى نفس الوقت.
يقع على الارض وتجلس هى بجانبه محاوله تمضيض جروحه...ثوانى يجد فى جزم
الناس الملتفه حوله جزمه بكعب يعرفها جيدا وأخذ يتذكر أين رأى هذا الكعب
من قبل...ينظر عاليا يجد خطيبته واضعه يديها فى وسطها....فتح فمه ليشرح
لها أسكته شلوت من جذمتها.
مرت ساعه وذهب الناس من حوله ولم يتبقى غيره والفتاه مازالت بجانبه تحاول إزاله أثار بوذ جزمه خطيبته عن وجهه.
هو:"خلاص أرتحتى دلوقتى ممكن تسيبينى بأه؟؟".
هى:"حاضر بس أنت ألى ماسك ذراعى دلوقتى".
هو:"أه صحيح....انا أسف جدا"
"انا صحيح قليل الذوق...ممكن أعزمك على سندوتش؟"
هى:"لأه تعالى نروح السينما"
هو:"ماشى سينما سينما...أنت شيلتى أيدك ليه؟؟".
هى:"عيب تمسك ذراعى قبل الخطوبه....هو انت صحيح هتخطبنى أمتى؟"
هو:" أول ما وشى يخف .......".